वर्धा : आई खरंच काय असते? लेकराची माय असते. वासराची गाय असते. दुधाची साय असते. लंगड्याचा पाय असते. धरणीची ठाय असते. आई भेटते तो अनुभव म्हणजे एक स्वर्गाची अनुभूती असते, असाच काहीसा प्रसंग आईपासून दुरावलेल्या अवघ्या २५ दिवसांच्या बिबट्याच्या आईसोबत पुनर्मिलन करून देण्यासाठी विशेष प्रयत्न केलेल्या वनविभागाच्या कर्मचाऱ्यांसह वन्यजीव प्रेमींना गुरुवारी मध्यरात्री आला. इतकेच नव्हे तर त्या दोघांच्याही डोळ्यात आभाळाएवढी व्याकूळताही बघावयास मिळाली.
आर्वी तालुक्यातील दहेगाव नजीकच्या पांझरा शिवारातील प्रल्हाद बडोदे यांच्या शेतात ऊस तोडणीचे काम सुरू असताना गुरुवारी दुपारी बिबट्याचे पिल्लू आढळून आले. बिबट्याचे पिल्लू बघून परिसरात एकच तारांबळ उडाली. शिवाय या घटनेची वार्ता परिसरात वाऱ्यासारखी पसरल्याने घटनास्थळी बघ्यांची तोबा गर्दी झाली. दरम्यान, वनविभागाच्या अधिकाऱ्यांना माहिती देण्यात आली. माहिती मिळताच आर्वी वनपरिक्षेत्र अधिकारी नितीन जाधव, वनविभागाचे निगोट, मेश्राम, सावंत, चव्हाण, तंबाखे, जी. बी. शेख, भालेराव यांनी घटनास्थळ गाठून बिबट्याच्या पिल्लाला सुरक्षित रेस्क्यू केले. त्यानंतर बिबट्याच्या पिल्लाची आरोग्य तपासणी करीत बिबट्याच्या पिल्लाचे आईसोबत पुनर्मिलन करण्याचा निश्चय वनविभागाने केला.
या कार्यात पीपल फॉर ॲनिमल्सच्या स्वयंसेवकांचीही मदत घेण्यात आली. आईसोबत पुनर्मिलन करून देण्याच्या उद्देशाने वनविभागाचे अधिकारी व वन्यजीव प्रेमी २५ दिवसांच्या बिबट्याच्या पिल्लाला सोबत घेऊन रात्रीच्या काळोखात स्वत:च्या जीवावर उदार होत नियोजित ठिकाणी पोहोचले. त्यानंतर बिबट्याच्या पिल्लास एकांतात सोडून त्याच्या हालचालींवर ट्रॅप कॅमेराच्या सहाय्याने वॉच ठेवण्यात आला. मध्यरात्री सुमारे १२.४५ वाजताच्या सुमारास डोळ्यात आभाळा एवढी व्याकूळता असलेली बिबट्याची आई पिल्लाचा आवाज ऐकून पिल्लाजवळ पोहोचली. शिवाय तिने तिच्या पिल्लाला तोंडात धरून जंगलाच्या दिशेने मार्गक्रमण केले.
