पवनार : येथील उड्डाणपुलाजवळ सोमवारी (दि. ८) दुपारी साडेबारा वाजताच्या सुमारास घडलेल्या भीषण अपघातात एक व्यक्ती गंभीर जखमी झाला. ट्रकच्या जोरदार धडकेत त्याच्या पायाला गंभीर दुखापत झाली असून त्याला तात्काळ सेवाग्राम रुग्णालयात दाखल करण्यात आले आहे.
प्राप्त माहितीनुसार, दुपारी साडेबारा वाजता पवनार उड्डाणपुलाजवळ सदर व्यक्ती डिव्हायडर ओलांडून रस्ता पार करीत होता. त्याचवेळी नागपूरहून वर्धेकडे येणारा MH 20 EG 1926 क्रमांकाचा ट्रक वेगात आल्याने त्या व्यक्तीला जोरदार धडक बसली. धडकेत तो रस्त्यावर फेकला गेला व त्याच्या पायाला गंभीर इजा झाली. अपघातानंतर रस्त्यावर काही काळ नागरिकांची मोठी गर्दी झाली. घटनेची माहिती मिळताच पोलिस पथक घटनास्थळी दाखल झाले. त्यांनी पंचनामा करून अपघाताची नोंद घेतली.
दरम्यान, जखमी व्यक्तीला घटनास्थळीच प्राथमिक उपचार करून तातडीने रुग्णवाहिकेतून सेवाग्राम रुग्णालयात हलविण्यात आले. त्याची प्रकृती गंभीर असल्याचे सूत्रांकडून कळाले आहे. अपघातानंतर काही काळ रस्त्यावर वाहतुकीला अडथळा निर्माण झाला होता. या घटनेबाबत पुढील तपास सेवाग्राम पोलिस करीत आहेत.
