वर्धा : रक्षाबंधन तसेच जागतिक आदिवासी दिनाचे औचित्य साधून वर्धा तालुक्यातील सुधीरभाऊ पांगुळ मित्र परिवारातर्फे पर्यावरण संवर्धनाचा एक आगळावेगळा उपक्रम राबविण्यात आला. निसर्गाशी आपले नाते अधिक दृढ करण्याचा संदेश देत उपस्थितांनी वृक्षांना राखी बांधून रक्षाबंधन साजरे केले. वृक्ष हेच आपल्या जीवनाचे खरे रक्षक आहेत या भावनेतून या उपक्रमाचे आयोजन करण्यात आले होते.
कार्यक्रमात उपस्थित मान्यवरांनी वृक्षारोपण आणि वृक्षसंवर्धनाचे महत्त्व अधोरेखित केले. वृक्षारोपण म्हणजे नवीन झाडे लावणे तर वृक्षसंवर्धन म्हणजे आधीपासून अस्तित्वात असलेल्या झाडांचे संगोपन आणि संरक्षण करणे होय. या दोन्ही गोष्टी पर्यावरणाचे रक्षण करण्यासाठी आणि जनजीवनाचा समतोल राखण्यासाठी अत्यंत आवश्यक असल्याचे प्रतिपादन करण्यात आले. झाडे कार्बन डायऑक्साईड शोषून घेऊन ऑक्सिजन निर्माण करतात, ज्यामुळे हवा शुद्ध राहते. ती मातीला धरून ठेवतात आणि मातीची धूप थांबवतात. पर्जन्यमानावरही झाडांचा सकारात्मक परिणाम होतो, ज्यामुळे पावसाचे प्रमाण वाढते. त्याचबरोबर झाडे वन्यजीवांना अधिवास देतात आणि फळे, फुले, लाकूड व इतर अनेक उपयुक्त साधने पुरवतात.
कार्यक्रमादरम्यान नागरिकांना आवाहन करण्यात आले की केवळ झाडे लावणे पुरेसे नाही, तर त्यांचे संगोपन करणेही तितकेच महत्त्वाचे आहे. आपल्या परिसरात जास्तीत जास्त झाडे लावून ती मोठी होईपर्यंत त्यांची काळजी घेणे ही प्रत्येकाची जबाबदारी असल्याचेही यावेळी सांगण्यात आले. पर्यावरणाचे आणि जीवनाचे रक्षण करण्यासाठी वृक्षारोपण व वृक्षसंवर्धन ही दोन अत्यंत आवश्यक कार्ये आहेत, म्हणून सर्वांनी मिळून या मोहिमेत सहभागी व्हावे असे आवाहन करण्यात आले.
या उपक्रमात सुधीर पांगुळ, प्रवीण होणारे, प्रवीण उपासे, विशाल हजारे, चंदू घोडे, पवन घोसेवाडे, मोहित ठाकरे, विवेक तळेकर, बादल शेळके, प्रल्हाद चौधरी, अनिल आत्राम आदी मान्यवर उपस्थित होते. कार्यक्रमात सर्वांनी एकत्रितपणे वृक्षांना राखी बांधून त्यांचे संवर्धन करण्याचा संकल्प व्यक्त केला.
