वर्धा : जिल्ह्यातील ब्लॅक स्पॉट्सवर वाढत्या अपघातांचा आणि सातत्याने होत असलेल्या जीवितहानीचा प्रश्न गंभीर बनत चालला असतानाही प्रशासनाची उदासीनता कायम असल्याचे वास्तव पुन्हा समोर आले आहे. या धोकादायक ठिकाणांबाबत माध्यमांमध्ये वृत्त प्रकाशित होऊन अनेक दिवस उलटले, तरीही संबंधित विभागांकडून कोणतीही ठोस हालचाल झालेली दिसून आलेली नाही. परिणामी, नागरिकांचे जीव अजूनही धोक्यात असून अपघातांचे संकट पूर्ववत कायम आहे.
जिल्ह्यात अधिकृतरीत्या घोषित करण्यात आलेल्या तब्बल ३२ ब्लॅक स्पॉट्सवर वारंवार भीषण अपघात होत आहेत. या ठिकाणी सुरक्षेच्या दृष्टीने तातडीने उपाययोजना करणे अपेक्षित असताना प्रत्यक्षात मूलभूत सुविधांचाही अभाव असल्याचे स्पष्ट झाले आहे. अनेक ठिकाणी चेतावणी फलक नाहीत, वेगमर्यादा दर्शविणारे बोर्ड गायब आहेत, रिफ्लेक्टिव्ह पेंट व कॅटआय बसविण्यात आलेले नाहीत, तर रात्रीच्या वेळी प्रकाशव्यवस्था अत्यंत अपुरी आहे. काही ठिकाणी रस्त्यांवर मोठमोठे खड्डे पडले असून डिव्हायडर तुटलेल्या अवस्थेत आहेत. महामार्गांवर मोकाट जनावरांचा वावरही अपघातांना कारणीभूत ठरत आहे.
माध्यमांमध्ये हा प्रश्न ठळकपणे मांडल्यानंतर सामान्यतः प्रशासनाकडून तातडीच्या बैठका, पाहण्या किंवा कृती आराखडा जाहीर होणे अपेक्षित असते; मात्र या प्रकरणात कोणतीही ठोस हालचाल झालेली दिसून आलेली नाही. संबंधित विभागांकडून अधिकृत प्रतिक्रिया देण्याचाही प्रयत्न करण्यात आलेला नसल्याने प्रशासनाच्या भूमिकेवर प्रश्नचिन्ह निर्माण झाले आहे. “प्रशासनाला या प्रश्नाचे गांभीर्यच नाही का?” असा संतप्त सवाल आता नागरिकांकडून उपस्थित केला जात आहे.
दरम्यान, जिल्ह्यात अपघातांची मालिका कायम असून लहान-मोठ्या घटनांमध्ये जखमी व मृत्यूचे प्रमाण चिंताजनकरीत्या वाढत आहे. प्रत्येक अपघातानंतर कारणांचा शोध घेतला जातो; मात्र दीर्घकालीन सुधारणा मात्र होताना दिसत नाही. वाहतूक विभाग, सार्वजनिक बांधकाम विभाग, राष्ट्रीय महामार्ग प्राधिकरण आणि स्थानिक प्रशासन यांच्याकडे अधिकार असले, तरी समन्वयाचा अभाव आणि जबाबदारी झटकण्याची प्रवृत्ती यामुळे परिस्थिती अधिकच गंभीर बनत आहे.
ब्लॅक स्पॉट्सवरील उपाययोजनांसाठी निधी, प्रस्ताव आणि टेंडर प्रक्रिया सुरू असल्याचे वारंवार सांगितले जाते; मात्र प्रत्यक्षात एकाही ठिकाणी काम सुरू झालेले नसल्याने “कागदोपत्री विकास” आणि “प्रत्यक्ष कृती” यातील दरी पुन्हा उघड झाली आहे. अपघात रोखण्यासाठी आवश्यक असलेल्या साध्या सुरक्षाव्यवस्थाही राबविण्यात येत नसल्याने प्रशासनाची निष्क्रियता आणखी ठळकपणे समोर येत आहे.
या पार्श्वभूमीवर नागरिकांमध्ये तीव्र संतापाची भावना निर्माण झाली असून, “जीव गेल्यावरच प्रशासन जागं होणार का?” असा संतप्त सवाल उपस्थित केला जात आहे. अनेक सामाजिक संघटना व स्थानिक नागरिकांकडून आंदोलनाची तयारी सुरू असल्याची माहिती पुढे येत आहे.
‘ब्लॅक स्पॉट’ की ‘मृत्यूचे खुले सापळे’?
जिल्ह्यात अपघातप्रवण म्हणून घोषित करण्यात आलेली ३२ ठिकाणे प्रत्यक्षात अधिक सुरक्षित असणे अपेक्षित असताना वास्तव मात्र भयावह असल्याचे दिसून येत आहे. अनेक ब्लॅक स्पॉट्सवर आजही कोणत्याही प्रकारच्या मूलभूत सुरक्षा उपाययोजना अस्तित्वात नाहीत. चेतावणी फलकांचा अभाव, वेगमर्यादा नियंत्रणाची व्यवस्था नसणे, रिफ्लेक्टिव्ह पेंट व कॅटआयचा अभाव, रात्री अपुरी प्रकाशव्यवस्था, रस्त्यांवरील खड्डे आणि तुटलेले डिव्हायडर या सर्व त्रुटी कायम आहेत. परिणामी हे ब्लॅक स्पॉट्स आता केवळ ‘अपघातप्रवण ठिकाणे’ न राहता प्रत्यक्षात ‘मृत्यूचे खुले सापळे’ बनले आहेत.
