सेलू : महाबळा फाट्यावर प्रवाशी घेण्यासाठी थांबून असलेल्या प्रवासी ऑटो क्रमांक एमएच 32, एके 0445 ला नागपूरकडून भरधाव येणाऱ्या कार क्रमांक एमएच 32, एएच 5016 ने जबर धडक दिली. यात ऑटोचालकासह एक प्रवासी जखमी झाला. ही घटना शनिवारी सायंकाळी घडली, अशी माहिती सेलू पोलिसांनी दिली.
शनिवारी सायंकाळच्या सुमारास अँपे प्रवासी ऑटो हा केळझर येथून प्रवाशांना घेऊन महाबळा फाट्याजवळ प्रवासी घेण्यासाठी थांबून होता. दरम्यान नागपूरकडून भरधाव येणाऱ्या कारचालकाचे वाहनावरील नियंत्रण सुटल्याने कारने उभ्या असलेल्या ऑटोला मागाहून जबर धडक दिली. यात ऑटो लोखंडी दुभाजकावर फेकला गेला. ऑटोत बसून असलेला चालक चंद्रशेखर रमेश तुमडाम रा. कोटंबा व केळझर येथून बसलेली पुनम अरविंदा कडू दोघे जखमी झाले. त्यांच्या पायाला जबर मार लागला आहे. दोघांनाही सेवाग्राम रुग्णालयात उपचारार्थ दाखल करण्यात आले आहे. ऑटो केळझर येथून वर्धेकडे जात होता. ऑटोत तीन प्रवासी होते. त्यात हिंगणी येथील अनिता यादवराव पारसे ही किरकोळ जखमी झाली. अपघाताची माहिती सेलू पोलिसांना मिळताच जामदार पांडे व अमोल राऊत यांनी घटनास्थळी दाखल होऊन घटनेचा पंचनामा केला. चंद्रशेखर तुमडामच्या फिर्यादीवरून कारचालक गणेश रेघे याच्याविरुद्ध गुन्हा नोंद करण्यात आला असून, पुढील तपास सेलू पोलिस करीत आहेत.
