पवनार : जिल्ह्यात तापमानाचा पारा दिवसेंदिवस वाढत असून, उकाड्यापासून दिलासा मिळवण्यासाठी युवकांचा मोर्चा आता नदीपात्रांकडे वळला आहे. पवनार परिसरातील धाम नदीपात्रात दररोज शेकडो युवक पोहण्यासाठी येत असून, सायंकाळच्या वेळेस येथे मोठी गर्दी होत असल्याचे चित्र दिसून येत आहे. विशेष म्हणजे केवळ पवनारच नव्हे, तर वर्धा शहरासह आसपासच्या गावांमधूनही युवक येथे पोहण्याचा आनंद घेण्यासाठी येत आहेत. मात्र एवढ्या मोठ्या प्रमाणावर गर्दी होत असतानाही या ठिकाणी कोणतीही सुरक्षा व्यवस्था नसल्याने गंभीर प्रश्न निर्माण झाला आहे.
धाम नदीपात्रातील थंडगार पाणी आणि विस्तीर्ण परिसरामुळे युवकांमध्ये या ठिकाणाची विशेष लोकप्रियता वाढली आहे. शाळा, महाविद्यालयांना सुट्ट्या लागल्याने दुपारनंतर आणि सायंकाळी नदीपात्रात युवकांची संख्या अधिक वाढत आहे. काही युवक तासन्तास पाण्यात पोहत वेळ घालवत असल्याचे दिसते. उकाड्यामुळे नागरिकांना नदीतील गारवा दिलासा देत असला, तरी दुसरीकडे सुरक्षिततेच्या दृष्टीने परिस्थिती अत्यंत चिंताजनक बनली आहे.
नदीपात्रात कोणतेही लाइफगार्ड, सुरक्षा रक्षक, इशारा फलक किंवा आपत्कालीन मदत व्यवस्था उपलब्ध नाही. काही ठिकाणी नदीची खोली अधिक असल्याने पोहण्यास धोका निर्माण होऊ शकतो. अनेक युवकांना नदीतील खोल भागाची माहिती नसते. शिवाय काही जण साहसी स्टंट करण्याचाही प्रयत्न करतात. अशा प्रकारामुळे अपघात होण्याची भीती व्यक्त केली जात आहे.
स्थानिक नागरिकांच्या मते, दरवर्षी उन्हाळ्यात युवक मोठ्या प्रमाणावर नदीत पोहण्यासाठी येतात; मात्र प्रशासनाकडून कोणतीही ठोस उपाययोजना केली जात नाही. नदीकिनारी सुरक्षा सूचना, प्रतिबंधित क्षेत्राची माहिती किंवा नियंत्रणासाठी कर्मचारी नियुक्त करण्यात आलेले नाहीत. परिणामी, एखादी दुर्घटना घडल्यास तत्काळ मदत मिळणे कठीण ठरू शकते.
विशेष म्हणजे अनेक युवक कोणतीही सुरक्षा साधने न वापरता खोल पाण्यात उतरतात. काही वेळा मित्रांच्या आग्रहाखातर पोहता न येणारे युवकही नदीत उतरतात. त्यामुळे दुर्घटनेचा धोका अधिक वाढतो. नदीपात्रात सध्या मोठ्या प्रमाणावर गर्दी होत असताना प्रशासनाने तातडीने सुरक्षा उपाययोजना कराव्यात, अशी मागणी नागरिकांकडून होत आहे.
सुरक्षिततेचा प्रश्न ऐरणीवर…
पवनार येथील धाम नदीपात्रात दररोज शेकडो युवक पोहण्यासाठी येत असून, सायंकाळच्या वेळेस येथे मोठी गर्दी होत आहे. वाढत्या उष्णतेपासून दिलासा मिळवण्यासाठी युवक नदीत जलमस्ती करत असले, तरी या ठिकाणी कोणतीही सुरक्षा व्यवस्था उपलब्ध नसल्याने दुर्घटनेची भीती व्यक्त केली जात आहे. नदीकिनारी लाइफगार्ड, सूचना फलक किंवा आपत्कालीन मदत व्यवस्था नसल्याने प्रशासनाच्या दुर्लक्षावर प्रश्नचिन्ह उपस्थित होत आहे. खोल पाण्याची माहिती नसतानाही अनेक युवक नदीत उतरतात. त्यामुळे प्रशासनाने तातडीने सुरक्षा उपाययोजना कराव्यात, अशी मागणी नागरिकांकडून होत आहे.
